Equo, Ezker Anitza-IU eta Podemos alderdi politikoek etxebizitzari buruzko kanpaina bat aurkeztu dute “Etxebizitzak bizitzeko dira, ez espekulatzeko, ezta legez kanpoko ostatuetarako ere” lelopean, eta Donostian burutuko da kanpaina hori, etxebizitzaren helburuaren eta etxebizitzak hirian bizi duen egoeraren inguruko debate sozialean sakontzeko asmoarekin.
Irabazi Donostia plataformako Amaia Martin (Ezker Anitza-IU) eta Loïc Alejandro (Equo) zinegotziek eta Iosu del Moral Podemoseko Donostiako Zirkuluko idazkariak parte hartu dute aurkezpenean. Hiru alderdi politikoek adierazi dutenez, Donostian inoiz ez da erraza izan etxebizitza lortzea, beti izan baita, eta horrela da orain ere, Estatu osoan metro karratu garestiena izan duen hirietako bat. Egoera horri turismoaren gorakada eta etxebizitza turistikoen fenomenoaren agerpena gehitu behar zaio, beste oztopo bat gehiago baita hori etxebizitza bat ohiko bizileku gisa lortzeko.
Horregatik guztiagatik, arazo horri buruzko sentsibilizazio-kanpaina bat abiarazi dute hiru alderdiek, hainbat puntu biltzen dituena. Alde batetik, sortu duten www.etxebizitzaSOSvivienda.org webgunearen aurkezpen publikoa komunikabideeentzat eta sare sozialentzat, webgune horren bidez kanpainaren eduki guztietara sartzeko aukera izanik.
Bestalde, bi hitzaldiren antolaketa nabarmentzen da: lehenengoa maiatzaren 10ean 19:00etan Anoetako Kirol Etxean, “Etxebizitzarako eskubidea: higiezinen espekulazioari aurre egiteko politikak”, Javier Burón Bartzelonako Udaleko Etxebizitzako gerentearen eskutik: Bigarrena, maiatzaren 22an, 19:00etan, Parte Zaharreko Abuztuaren 31 kaleko Dr. Camino Liburutegian, “Udalak etxebizitza turistikoen boomaren aurrean” gaiaren inguruan, Jorge García Castaño Ahora Madrid alderdiko Erdialdeko Barrutiko zinegotziaren eskutik.