- Martxoko hil honetan amaituko dute sarbide indibidualizatua duten 873 edukiontzi marroiak jartzetik
- “Edukiontzi organiko ia guztiak bere txiparekin dagoeneko instalatuta dauden honetan, hobari hori ezingo da askoz gehiago atzeratu. Herritarrak egunerokoan birziklatzen has daitezen eta ohitura beretu dezaten, erraztasunak eta pizgarriak eman behar zaizkie”, esan du Óscar Fernández bozeramaileak
Elkarrekin udal taldeak (Podemos-IU-Berdeak EQUO) datorren udalbatzarrean korporazioari konpromisoa eskatuko dio, zerga arloko neurri pizgarriak aplika daitezen eta hala hondakin organikoen bilketa tasak eta komunitatean konpostatzeko tasak handitu daitezen. Orain arteko datuak ez dira pozteko modukoak. Aldundiaren behatokiak dakarrenez, hondakinetara botatakoaren %47 biohondakinak dira. Kopuru kezkagarria da Elkarrekin taldearen ustez, eta horri buelta nola edo hala eman beharra zaio.
ELKARREKIN taldeak zerga arloko azken eztabaidan, jada, %10eko hobaria proposatu zuen hondakin organikoak biltzeko irekiera indibidualizatua duten edukiontzi marroiak egunerokoan erabiltzen dituztenentzat eta komunitatean konpostatzeko programetan parte hartzen dutenentzat, baina udalbatzarrak azkenean ez zuen onartu proposamena.
Orain, Gasteizko udalerrian irekiera indibidualizatua duten edukiontzi organiko ia guztiak jarrita dauden honetan, Elkarrekin taldea berriz saiatuko da neurria jarrarazten, uste duelako horrela herritarrak animatuko direla materia organikoa birziklatzera eta beraz bilketa tasak igoko direla. Hori dela eta, datorren Udalbatzarrera eramango du debatea.
“Ez diogu uko egingo neurri horri, erabat ziur baikaude baliagarria dela. Edukiontzi organiko ia guztiak dagoeneko instalatuta dauden honetan, hobari hori ezingo da askoz gehiago atzeratu. Herritarrak egunerokoan birziklatzen has daitezen eta ohitura beretu dezaten, erraztasunak eta pizgarriak eman behar zaizkie. Pausoak eman behar ditugu ingurumenaren aldeko zerga sistemarantz, Europak ezartzen dituen birziklatze kuotak iritsiko baditugu”, esan du Elkarrekin taldeko bozeramaileak, Óscar Fernándezek.
2022ko urrian, materia organikoa biltzeko sistema berria ezartzen hasi ziren txipa duten edukiontziekin. 2023ko martxoan amaituko dute sarbide indibidualizatua duten 873 edukiontzi marroiak jartzetik.
Aldi berean, aurrera doa komunitatean konpostatzeko programa, dagoeneko udalerriko zenbait puntutan sendotua dagoena, hau da, Salburuan, Zabalganean, Lakuan eta Goikolarrean.
Irekiera indibidualizatuko edukiontzi marroietan hondakin organikoak egunero botatzeko bizikidetza unitateei eta komunitatean konpostatzeko 2024ko programan era aktiboan parte hartzen dutenei hobariak aplikatzeko konpromisoa ez ezik, Elkarrekin taldeak, eskaria osatzeko, hobaria jaso nahi dutenen udal erregistroa eskatu du, bai eta edukiontzi marroiak ezagutarazteko informazio eta sentsibilizazio kanpainak indartzea ere