- Alderdi berdeak Airearen Zaindariak proiektuaren jarraipena egin du; izan ere, Airearen Zaindariak proiektuak airearen kalitatea aztertzen du neurketarako estaziotzat landareak erabilita, eta hiriko hainbat gunetan sakabanatutako neurketako 224 punturen bitartez
- Datuen arabera, trafikoa eta industria-jarduerak funtsezkoak dira hiriko hainbat gunetan behatutako kutsadura-patroiari dagokionez; esaterako, Zaramagan, Salburuan edo erdigunean erregistratutako kutsadura-balioak gomendatutako balioen oso gainetik daude
Airearen Zaindariak proiektuaren lehenengo emaitza zientifikoak ikusita, EQUO Berdeak alderdiak berriz eskatu du Arabako hiriburuak Airearen Kalitatearen Plan bat behar duela gehiago luzatu gabe; izan ere, proiektu horretan airearen kalitatea aztertzen da neurketarako estaziotzat marrubi-landareak erabilita, eta kezkatzeko moduko datuak eman ditu Gasteizko airearen kalitateari buruz.
Ibercivis Fundazioak egin du azterlana, Enrique Navarrok, Daniel Brunok eta Miguel Sevillak gainbegiratuta; azterlan horren arabera, Bartzelonaren atzetik, Gasteiz da airea kutsatuen duen hiria, ikerketan aztertutako hiriburuen artean.
Alderdi ekologistak airearen kalitatea aztertzen duen proiektuaren jarraipena egin du; proiektu horretan, airearen kalitatea aztertu dute 2019ko irailaren amaieratik 2020ko otsailera bitarte, neurketarako estaziotzat landareak erabilita eta hiriko hainbat gunetan sakabanatutako neurketako 224 puntutan. Landare horien bitartez metal astunen kontzentrazioa kontrolatzen dute.
Landareek ingurumeneko kutsadura monitorizatzeko estaziotzat dihardute, airean dauden partikulak hostoetan metatzen baitituzte; horixe da Fundazioak jarraitu duen metodologia.
Hostoetan dauden partikulen jatorri nagusia erregai fosilen erreketa da, baita hainbat elementuren higadura ere, hala nola freno-diskoak eta gurpilak tren eta tranbiaren trenbideetan. Datuen arabera, trafikoa eta industria-jarduerak funtsezkoak dira hiriko hainbat gunetan behatutako kutsadura-patroiari dagokionez; esaterako, Zaramagan, Salburuan edo erdigunean erregistratutako kutsadura-balioak gomendatutako balioen oso gainetik daude: 645-6037 (balioak µA m2/kg-tan).
Alderdi berdeko kideak ez dira harritu datu horiek ikusita; izan ere, beste batzuetan ere, Ingurumen Sailaren airearen kalitatea neurtzeko sare konbentzionaletan gainditu izan baitira airean dauden kutsatzaileen muga onargarriak. Horregatik, aldarrikapena behin eta berriz adierazten dute Udalak Airearen Kalitatearen Plana presta dezan, herritarren osasuna dagoenez arriskuan.