EQUO alderdi ekologistako buru eta Elkarrekin Podemos koalizioaren Kongresurako hautagai Juantxo López de Uraldek Gasteizen iragarri du gaur trenbidea Gasteiztik pasatzean erabat lurperatzeari buruzko azterlana egiteko konpromiso irmoa, Gobernura iristen badira. López de Uraldek gogora ekarri duenez, Elkarrekin Podemos da eredu hori defendatzen dien bakarra, EAJk, PSEk eta PPk defendatutako ereduak Salburua eta Zabalgana bigarren mailako auzoak izatera kondenatzen baititu.
Uraldek proposatu du joan den urtarrilean Ábalos ministroak trenbidea lurperatzeko aurkeztutako proposamena bertan behera uztea, eta, horren ordez, lurperatze osoa (bi auzo horiek barne), Europako iparraldearekin lotzeko egingo den trenbide-autobidea eta Jundizko salgaien intermodala proiektu bakarrean integratzea.Integrazioa funtsezkoa baita 2030eko Gasteizek beharko dituen soluzioak emateko.
Juantxo López de Uraldek gogora ekarri duenez, Ministerioaren eta Eusko Jaurlaritzaren proiektua ez da nahikoa, inondik inora, merkataritza-trenen igarotzeko maiztasunak mantentzeko biderik ez duelako emango, salgaiak errepidetik trenbidera eramateko Europak ezarritako helburuen eskakizunei jarraikiz. “Egungo proiektuaren arabera ezinezkoa da Europak ezarritako eskakizunak betetzea, Salburua eta Zabalgana auzoetako zenbait tarte lur gainean baitaude”, hautagai berdeak azpimarratu duenez.
Elkarrekin Podemosek beste behin ohartarazi duenez, Gasteizen lurperatze-proiektua egokia izan dadin, funtsezko hiru betekizun hauek bete behar ditu:
1. Bidaiari eta salgaien zirkulazio-premiei erantzutea trenbide-trazatu bakar baten bitartez, udal-mugartean gizarte- eta ingurumen-inpaktua minimizatzeko helburuarekin.
2. 1.500 metrorainoko salgai-konboien zirkulazioa baimentzea, Gasteizek erdigune estrategikoa izaten jarrai dezan Penintsulatik Europako iparralderanzko salgaien zirkulazioan.
3. Lurpeko trazatu bat eraikitzea trazatuaren ardatzetik lerro zuzenean gutxienez 500 metrora dauden bizitegi-eraikinak dituzten hiri-eremuetan, azpiegitura horrekin zerikusia duten eragozpen eta arriskuak saihesteko.
Uraldek aipatu duenez, bi proiektuak (lurperatze osoa eta trenbide-autobidea) integratzea da, benetako helburua —salgaiak errepidetik trenbidera eramatea— betetzeko bide bakarra. Gainera, hain inbertsio handia duen proiektu batek Europako finantziazioa behar du, eta hori bi proiektuak integratuz baino ezin daiteke lortu. Horixe da XXI. menderako benetako proiektu estrategiko globala”, azpimarratu du.
Juantxo López de Uralderekin batera Fernando López Castillo eta Oscar Fernández udal-hautagaiak egon dira, eta haiek adierazi dutenez, “penagarria da EAJ, PSOE eta PP Zabalgana eta Salburua auzoekin erakusten ari diren arduragabekeria eta egiten ari diren injustizia soziala, lehendik urrunen zeuden eta zerbitzu okerrenak zeuzkaten auzoak baziren, orain eskubide bat ukatu nahi dietelako, hain zuzen ere, gainerako herritarrek beren auzoetan trena lurperatzeko duten eskubidea”.