Datorren osoko bilkuran mozioa defendatuko dute bi alderdiek Udalak barakaldarren hipoteken inguruko zalantzak argitu ditzan. Euskadin zoru-klausulak dituzten 80.000 pertsona daudela gogorarazi dute Podemos eta Irabazik, “bankuen gehiegikeriaren beste adibide argi bat”.
Irabazi eta Podemosek datorren osoko bilkuran zoru-klausulen dirua itzultzeko tramiteak errazteko zerbitzua martxan jartzeko eskatuko dio Udalari mozio baten bitartez. Begi onez ikusi dute bi alderdiek Europar Batasuneko Justizia Auzitegiko erabakia, zoru-klausulen guztizko atzeraeragina onartuz, “bankuen gehiegikeriaren adibide argia” delako.
“Kontsumitzaileen elkarteek erabiltzaileak epaitegietara jo baino lehen bankuetara joateko gomendioa egiten dute, baina litekeena da entitateak zoru-klausulen dirua ez bueltatzea edo, honen trukean, akordio-tranpa bat zinatzea eskaintzea, parte bat bakarrik itzuliz. Beraz, negoziaziorako baliabide gehiago dituztenen gehiegikeri baten aurrean egongo ginateke berriz ere”, azpimarratu dute Podemos eta Irabazik.
Konsumitzaileen eskubideak bermatzeko hasieratik “behar bezala aholkatuak” egotearen garrantzia aipatu dute. Udalak herritarrengandik “gertuen” dauden erakundeak diren heinean, “gehiegikeri honen aurrean ezin dute jarrera neutrala izan eta kontsumitzaileen alde agertu behar dira”.
Honengatik guztiagatik, Podemos eta Irabazik Udalari eskatu diote zoru-klausulen gaineko aholkularitza zerbitzu berezia martxan jartzeko, Bizkaiko Abokatuen Elkargoarekin elkarlanean. Era honetan, herritarek zoru-klausulak dituzten hipotekak izatekotan, “bidegabeko ordainketa” hori itzultzeko eman beharreko pausuak edo tramiteak erraztuko lirateke.
Horrez gain, aurkeztutako mozioan bi alderdiek Udalari Foru Aldundiaren eta lurraldean sortzen diren udal-zerbitzuen arteko elkarlana sustatzea eskatu diote.