Proposamena udal-gobernuko taldearekin adostu da, eta Interneten bidez ematen diren indarkeria matxistak geldiaraztea du helburu, sentsibilizazio-tailerren eta prebentzio-programen bidez, Eusko Jaurlaritzarekin lankidetzan.
Bilboko udalbatzak Elkarrekin Bilbaoren proposamena onartu du gaur, Podemosek, Ezker Anitza-IUk eta Equo Berdeakek osatutako udal taldearen proposamena, hain zuzen ere. Onarpenaren bidez, Bilboko Udalak konpromisoa hartzen du “Eusko Jaurlaritzarekin lankidetza indartzeko ziberjazarpena eta ziberindarkeria prebenitzeko eta ezabatzeko programak eta jarduerak ezartzeko”, eta “indarkeria matxistei buruzko prebentzio-tailerren edukiak osatzeko ere, ziberjazarpenari eta ziberindarkeriari buruzko informazioari eta kontzientziazioari dagokienez”. Zentzu horretan, “akordio honek haur eta nerabeek jasaten dituzten indarkeria matxisten prebentziorako ikastetxeetan ematen den prestakuntza osatzea aurreikusten du, DBHko, Batxilergoko eta CIPeko ikasleentzat”, azaldu du Carmen Muñozek.
“Errealitate matxista digitalak” gai “berria” da, konektagarritasunari eta Internet komunikatzeko modu gisa erabiltzeari lotuta. Zinegotziak adierazi duenez, “internetek gure bizitzak aldatu du, eta beharrezkoa da neurriak martxan jartzea emakumeen aurkako indarkeriak sor ez daitezen”. Carmen Muñozek gogorarazi duenez, “Genero Berdintasunaren Europako Institutuaren (EIGE) arabera, egungo testuinguruan, genero indarkeria mundu mailako proportzioen eta ondorio oso esanguratsuen arazo gero eta handiagoa da”.
Datuek berez hitz egiten dute: “Europako Parlamentuaren ebazpen batek, aurtengo urtarrilaren 21ekoak, adierazten du Europar Batasunean 15 urtetik gorako hiru emakumetik batek indarkeria fisiko edo sexualen bat jasan duela, eta hamarretik batek jazarpena jasan duela Interneten, Amnistia Internazionalaren arabera, hamarretik 2,3 dira. Plan International gobernuz kanpoko erakundeak 2020an egindako ikerketa batean, 10 haur eta nerabetik seik jazarpena jasaten dute sare sozialetan “, deitoratu du Muñozek.