- Gasteizko Udalaren Lurraldearen eta Klimaren aldeko Ekintzaren Saileko zinegotzi Ana Oregik jakitera eman duenez, dagoeneko SHESAk udalari eskatu dio Armentia-2 putzuan gasa miatzeko jarduera-lizentzia.
EQUO Berdeak alderdiko zinegotzi Óscar Fernándezek egindako galderari erantzunez, Gasteizko Udalaren Lurraldearen eta Klimaren aldeko Ekintzaren Saileko zinegotzi Ana Oregik jakitera eman du Euskadiko Hidrokarburoak Baltzuak (Shesa) Udalari eskatu diola Armentia-2 putzuan gasa miatzeko jarduera-lizentzia ematea.
Euskadiko alderdi berdea kezkatuta dago, Udal Gobernuak zer erabakiko duen zain, sozietate publikoaren eskutik jasotako dokumentazioa aztertzen ari direlako egunotan. EQUO Berdeak alderdiak Gorka Urtaranen Gobernu-taldeari eskatzen dio erantzukizunez eta koherentziaz jarduteko, eta, horrenbestez, SHESAri jarduera-lizentzia ukatzeko.
EQUO Berdeak alderdiaren ustez, SHESAren eskaerak ez du inolako zentzurik, kontuan hartuta, batetik, joan den uztailean Kongresuak EQUO Berdeak alderdiaren zuzenketa bat onartu zuela, erregai fosilen gaineko ikerketak ezabatzea exijitzen duena, eta, bestetik, Gobernu zentrala tramitatzen ari den Klima Aldaketari buruzko Legearen atarian gaudela, ustekaberik ez bada, ildo horretan sakonduko duena.
Alderdi berdearentzat ulertezina eta onartezina da Eusko Jaurlaritzak eta haren Ekonomiaren Garapen, Jasangarritasun eta Ingurumen Sailak (SHESA haren mendekoa da) dirua xahutzen jarraitzen dutela ikustea, euskal erkidegoan gasa bilatzeko ahalegin ustelak eginez, energia hori zaharkituta dagoela eta klima-aldaketaren efektuak arintzeko hartutako konpromisoekiko bateraezina dela aintzat hartuta. Alferrik gastatutako diru guztia energia berriztagarrietan inbertitzeko erabil zitekeen.
“Koronabirusaren krisiak energia fosilen errentagarritasuna behin betiko lurperatu duela ikusirik, bada garaia Eusko Jaurlaritzak, behin betiko, euskal lurraldean gas naturaleko hobi berriak behin eta berriz bilatzeko ahaleginak bertan behera uzteko, horren ordez, ausardiaz jokatuz, energia berriztagarri, errentagarri eta garbietan eta gure etorkizunean inbertitzeko”, EQUO Berdeak alderdiko kobozeramaile José Ramón Becerrak azpimarratu duenez.
