- Zenbait informazioren arabera, merkataritza-kate handiek erosketa masiboak egin zituzten, modu koordinatuan, prezioekin espekulatzeko, eta, horrela, tokiko saltoki txikira igotzera behartu zituzten, beraiek mantentzen zituzten bitartean.
- Legez kanpoko taktika horrek tokiko baserritarren krisia areagotu du.
EQUO Berdeak-en arabera, merkataritza-kate handiek alarma-egoera deklaratu ondorengo egunetan izandako jardunak, erosketa masiboaren bidez oinarrizko elikagaien prezioak handituz, argi eta garbi urratzen ditu lehia askearen printzipioak.
Hainbat informazioren arabera, kate handiek modu koordinatuan egin zituzten erosketa masibo horiek, prezioekin espekulatzeko. Elikagaiak bereganatzearen ondorio nagusia jatorrian zeuden prezioen igoera izan da, eta horrek berehala eragin du saltoki txikietan. Saltoki handiek alarma-egoera deklaratu aurreko prezio merkeak mantendu ahal izan dituzten bitartean, saltoki txikiek igo egin behar izan dituzte, banaketa-kate handiek abian jarritako taktikaren ondorioz.
Horregatik, alderdi berdeak idazki bat bidali du gaur goizean, eta, bertan, formalki eskatu dio Lehiaren Euskal Agintaritzari ofiziozko ikerketa bat irekitzea; izan ere, beste behin ere, kate handiek modu koordinatuan jardun dute, merkatuaren orekak beren mesedetan aldatu nahian. Kontsumitzaileak dira, azkenean, legez kanpoko praktika horien gainprezioa ordaintzen dutenak. Ikerketa horrek bat egin dezake Lehiaren Euskal Agintaritzak atzo ehorztetxeen aurka iragarritako jardunarekin.
Gainera, egoera hori bat dator aire zabaleko tokiko elikagaien dozenaka merkatu ixtearekin, udal askok konfinamendu-neurriak oker aplikatu dituztelako. Egoera horretan, beharrezkoa zen jarduera berehala arautzea kanpoko merkataritza-gune horietan, kutsatzeak prebenitzeko, gainerako elikadura-establezimenduetan gertatzen den bezala. Baina Segurtasun Sailak eta udalak merkatuen baimenak bertan behera uztera mugatu dira.
“Erabaki horien ondorioz, euskal herritarrek elikadura jasangarriko, hurbileko, ekologikoko eta kalitateko eskaintza eskasa izan dute, eta horren ordez, elikadura garestiagoa eta kalitate txikiagokoa izan dute, ehunka kilometrora ekoitzitako elikagaiekin; hauen lekualdatzean pertsona gehiago sartu dira, kutsatzeko arrisku handiagoarekin”, azpimarratu du EQUO Berdeak alderdiko bozeramailekidea den José Ramón Becerrak.
Ildo horretan, EQUO Berdeak-ek Eusko Jaurlaritzari eskatzen dio jardun dezala hurbileko elikadura-hornidura bermatzeko, eta une honetan oso egoera zailean bizi diren hurbileko tokiko ekoizpenak eta merkatuak mantentzen direla ziurtatzeko.