- Alderdi berdeak Gobernu Taldea eta Osoko Bilkura zentsuratu ditu, erabaki hori hain salbuespenezko une batean hartzeagatik eta zuzenean kaltetutakoen, merkatarien, artean aurretiazko kontsulta bat egin gabe.
- “Adreiluaren garaiko hirigintza ereduaren” berezkoa den proiektu hau birplanteatzeko eskatu dute, eta duelako inondik inora bat egiten hirigintza iraunkorraren arloan ezarritako helburuekin.
EQUO Berdeak Uribe Kostaren arabera, Sopelako Udaleko Osoko Bilkuraren eta EAJk eta PSEk osatutako tokiko gobernu-taldearen jokabidea onartezina da, konfinamendu-ordena eta alarma-egoeran onartu baitute udalerriaren kanpoaldean merkataritza-gune berri bat eraikitzea.
Funtsezkoak ez diren jardueren establezimenduek, dekretua betez, negozioen pertsiana jaisten zuten bitartean, Udalak, osoko bilkura birtual batean, merkataritza-gune bat eraikitzea onartu du, erabaki horrek zuzenean eragiten dien pertsonen eta Merkatarien Elkarteen artean inolako aurretiazko kontsultarik egin gabe. Herritarrei ere, beren etxeetan konfinatuta jarraitzen dutela, ez zaie behar bezala jakinarazi, zundaketa egiteko eta proiektu horri buruz duten iritzia aintzat hartzeko.
Alderdi berdeak erabat gaitzesten du merkataritza-gune hori eraikitzea; izan ere, adreiluaren garaiko “eredu urbanistiko harrapari eta neurrigabearen” berezko proiektua da, eta ez die inola ere erantzuten hirigintza jasangarriaren arloan ezarritako helburuei. “Ez dator bat osasun-larrialdiko egoerarekin eta larrialdi klimatikoko garaiekin; izan ere, kontsumo- eta mugikortasun-eredu bati eusten dio, auto pribatuan joan-etorriak egitea dakarrena eta saltoki handiei mesede egiten diena ETEen eta hurbileko merkataritzaren aurrean, herriaren eta bertako biztanleen bizitza eta kohesioari kalte eginez”, adierazi du Gurutz Tercillak, Uribe Kostako batzarretik.
Guzti horrengatik, EQUO Berdeak alderdiak Sopelako gobernu-taldeari eskatu dio “egungo hirigintza-araudiarekin bat ez datorren hirigintza-eredu zaharkitu bat iraunarazten duen proiektu baten” onarpena birplanteatzea.
Alderdi berdeak, halaber, Sopelako Hiri Antolamenduko Plan Orokorra berrikusteko beharra planteatzen du, Lurralde Antolamenduaren Gidalerro berrietan ezarritako ildo berrietara egokitzeko.
Bestalde, EQUO Berdeak-en ustez, bertako merkatuak, hurbileko dendak, ekoiztetxe txikiak eta herriko saltokiak izango dira koronabirusa eragiten ari den krisi ekonomikoaren eragina gehien jasango dutenak. Horregatik, berreraikuntza tokiko mailatik ere bideratzeko beharra planteatzen du, udalerrietako ehun sozial eta ekonomikoaren erreparazioari helduz.