- Koalizioak erreferendum lotesle bat egitea eskatuko du Kongresuan, baita lurralde-mugak aldatzeko lege organiko bat ere
EQUOko buru eta Elkarrekin Podemosen Kongresurako hautagai Juantxo López de Uralde eta Senaturako hautagai Conchi Palenciak hauteskunde-ekitaldi bat egin dute gaur goizean Trebiñuko Konderriko udalerriko hiriburuan, herria ikusi ondoren.
Hautagai berdeak ziurtatu duenez, legegintzaldi honetan erantzuna emango zaio azkenean enklabe horretako herritar gehienen betidaniko eskaerari. Elkarrekin Podemosek Gobernuari eskatuko dio legezko erreferendum lotesle baten deialdia egin dezala, berme guztiekin. “Argantzuko eta Trebiñuko udaletako herritar gehienak askotan azaldu dira Arabara biltzearen alde. Alderdi guztiak dira betidaniko gogo horren jakitun, baina orain arte ez dute borondate politikorik eduki behin betiko konponbidea mahai gainean jartzeko. Eta guk hainbeste urtetako blokeo hori amaituko dugu”, adierazi du López de Uraldek.
Enklabearen egoera geldituta dago, eta lurralde-mugak aldatzeko lege organiko bat edukitzea ezinbesteko urratsa litzateke, halaber, egoera horri buelta emateko eta aurrera egiteko.
Alderdiarentzat ulertezina da 2019an oraindik ere milaka pertsona diskriminatuta egotea oinarrizko zerbitzu publikoak eskuratzeko orduan, anakronismo administratibo baten eta erakundeen oztopatze iraunkorraren ondorioz.
Burgosko eta Arabako aldundiek lortutako akordioaren ondorioz zazpi lankidetza-hitzarmen sinatu ziren, besteak beste babes zibilaren eta larrialdietarako arretaren, adinekoen gizarte-arretaren, genero-indarkeriaren aurkako borrokaren eta euskararen normalizazioaren alorretan; akordio hori positiboa izan da, baina behin-behineko neurriak baino ez dira azken batean. “Ez da nahikoa, behin-behineko zerbait baizik. Enklabe honetako herritarrek, denbora gehiegi, zenbait belaunaldi daramatzate zentzugabekeria horren ondorioak sufritzen. Elkarrekin Podemosek konponbidearen eguna finkatuko du”, ziurtatu du Conchi Palencia hautagaiak.