- Unidos Podemos koalizioko EQUO alderdiko diputatuak galdera bat erregistratu du Kongresuan zentral nuklearreko bi estoldatan detektatutako zesio-hondakinen jatorria eta langile batek maiatzean izandako kutsadura argi dezaten
- Hainbat hilabetez bi gertakariak –maiatzean eta ekainean jazotakoak– ezkutatu izanagatik kritikatu du CSN Lopez de Uraldek
Ekainaren 26an Garoñako zentral nuklearrean egindako ikuskapenean 137 zesio erradioaktiboaren hondarrak detektatu ziren turbina kokatuta dagoen eraikinaren urak biltzen dituzten bi estoldatan. CSN Segurtasun Nuklearreko Kontseiluak informazio hori gorde egin du hainbat hilabetez, joan den astelehenean barne-komunikatu batean zabaltzea erabaki zuen arte. Horrela jakinarazi du Arabako informazio-aldizkari bateko kazetari batek.
CSN Segurtasun Nuklearreko Kontseilu horrek egindakoaren berri izan bezain laster, Unidos Podemos koalizioko EQUO alderdiko diputatu Juantxo Lopez de Uraldek urgentziaz erregistratu du galdera bat Kongresuan Burgosko plantako instalazioetako bi hustubidetan detektatutako hondakinen jatorria azal dezaten.
Lopez de Uraldek CSNren jarduna kritikatu du, gertatutakoari buruz informazioa eman eta erantzukizunez eta erabateko gardentasunez jardun beharrean, informazio hori denbora luzez gordetzearen alde egin duelako. “Jarrera hori errepikatu egiten da. Ez da lehen aldia erakunde horrek langileentzat eta zentral nuklearraren ingurunearentzat arriskugarriak diren gertakariak isilarazten dituena. Azalpenak eskatuko ditugu berriro”, diputatuak azpimarratu duenez.
Lopez de Uraldek uste du gertatutakoak nolabaiteko laxokeria uzten duela agerian Garoñako segurtasun-protokolo eta -neurrien aplikazioan, eta jarduerarik gabe egon arren, arrisku bat izaten jarraitzen du zentralak, bertan gordetzen diren hondakin arriskutsuen ondorioz. Izan ere, CSNren bigarren komunikatu batean, plantako langile batek jasandako kutsaduraz ere hitz egiten da, komunikabide berak zabaldu duenez. Gorabehera maiatzean gertatu zen, hauts oso fin baten hondarrak detektatu zirenean langile baten arropetan.