Irabazi Donostia udal taldearen (Ezker Anitza-IU, Equo eta independenteek osatutakoaren) zinegotzi diren Amaia Martin eta Loïc Alejandrok “Elkar Lanean” izeneko ekitaldi politiko eta ludikoa aurkeztu dute, legealdiko hiru urte pasatu diren aitzakian. Ekinaldia, ekainaren 9an, larunbatez, izango da Urumea pasealekuan –autobus geltokiaren goiko gunean-, 16:00etatik 19:30era.Martin eta Alejandroren esanetan, bi dira “Elkar Lanean”en helburuak: batetik, Irabazi Donostiak egindako lana erakustea eta, bestetik, beste hiri batzuetako udaletako zinegotzien esperientziak azaltzea.
Bigarren xedeaz, Amaia Martinek esan du bi izango direla ekitaldian parte hartuko duten pertsonak: bata, Iruñeko Udaleko Gizarte Ekintzako zinegotzi eta Izquierda Ezkerra alderdiko kide den Edurne Eguino eta, bestea, Zaragozako Udaleko Langile eta Zerbitzu Publikoetako zinegotzi eta Zaragoza En Común alderdiko kide den Alberto Cubero. Ekitaldian, bi horiek, udal gobernuetako kide izanik, egindako hainbat gauzari buruz informatuko dute: Eguinok Iruñeko etxez etxeko zerbitzuaz eta, Cuberok, aldiz, Zaragozako kontratazio publikoak kontrolatzeko behatokiaz.
Loïc Alejandrok, bere aldetik, adierazi du “Elkar Lanean”en Euskadiko Irabazi udal taldeetako beste zinegotzi batzuek ere hartuko dutela parte, behin oraingo legealdiko hiru urte pasatuta, euren proposamen eta esperientzien berri emate aldera.
Ekitaldian, halaber, musikak eta antzerkiak beren tartea izango dute. Musikak, Sara Grajal eta Pablo Biurrun bikotearen eta Luke Armstrong-en taldearen eskutik. Eta antzerkiak, “Clownsura”ren eskutik. Era berean, haurrentzako txoko bat egongo da.
Amaitzeko, Irabazi Donostiaren bi zinegotziek donostiar guztiak gonbidatu dituzte “Elkar Lanean”era joatera. Izan ere, beren hitzetan, aukera ona izango da honako gauzak ezagutzeko: zeintzuk diren beste hiri batzuetako hiritarren arazoak eta kexak, eta zein diren problema eta kexei erantzuteko zinegotziek dituzten proposamenak.