- Irabazi Eibar koalizioak Gobernu-taldeari eskatu dio Aldatze kalean 58 plazako aparkalekua eraikitzeko proiektua birpentsa dezala, askoz ere garestiagoa delako eta ingurumen-inpaktu handiagoa duelako koalizioak aurkeztutako proposamenak baino
Irabazi koalizioak ez du begi onez ikusten Aldatze kalean aurreikusitako 58 plazako aparkalekuaren proiektua, eta eraikuntza horren ordez proposatu du erabilerarik ez duten industria-eraikin zaharrak birmoldatzea eta, haien barruan, aparkalekuak jartzea. IU-Ezker Anitza eta EQUO Berdeak alderdiek osatutako koalizioak Eibarko Gobernu-taldeari eskatu dio kale horretako 2. zenbakian kokatutako udal-lursailean bi solairuko aparkalekua eraikitzeko proiektua birpentsa dezala, proiektu hori “askoz ere garestiagoa delako eta inpaktu handiagoa duelako” abandonatutako eraikinak berreskuratzeko koalizioak egin duen proposamenak baino. “Hirigunean bat baino gehiago dauzkagu, eta erabilera berri horretara egokitzea merkeagoa izango litzateke eraikin berri bat altxatzea baino. Heltzeko erraza dela iruditzen zaigu. Teknikoki errazak diren konponbideak eskatzen ditu. Gainera eremu berririk ez litzateke okupatuko, oso kontuan hartzekoa da hiriaren mugak aintzat hartuta, eta beraz, ingurumen-inpaktua txikiagoa izango litzateke”, azpimarratu du María Jesús Aguirrek, EQUO Berdeak alderdiak Irabazi Eibar koalizioan duen zinegotziak.
Zinegotziak nabarmendu duenez, alternatiba horrek plaza bertikal gehiago sortzeko helburua ere beteko luke, Gobernuak ezarritako helburuarekin bat etorriz.
Datozen asteetan hasiko dira proiektua esleitzeko beharrezkoak diren izapideak, eta Irabaziko zinegotziak Gobernuari eskatu dio une hori iritsi baino lehen beste aukera hau azter dezala, hirian aparkalekurik ezak eragindako arazoak arintzeko lagungarri izango litzatekeelako, bide batez gastua murriztuz eta eraikin berri bat altxatu beharrik gabe. “Horrela berdegunea kontserbatuko litzateke, Ardantza eremuan bizi diren pertsona ugarien gozamen eta aisiarako”.
Irabazik berriz ere adierazi du hiriko berdegune bat desagerraraztearen aurka dagoela, eta gogora ekarri du hirian naturaz gozatzeko horrelako eremuak benetan urriak direla.