Otsaileko osoko bilkuran, Irabazi Barakaldoko EQUO Berdeak alderdiko zinegotzi Ramón Sánchezek gobernu-taldeari eskatu dio osorik bete ditzala bosgarren edukiontziaren inguruan 2016an hartutako konpromisoak. Urtebete igaro da birziklatzeko ontzi horiek jartzeari buruzko mozio bat onartu zenetik eta “puntu bat bakarrik bete da oso-osorik”.
Sánchezek adierazi duenez, “zerbitzua hedatu den auzoen kopurua igo egin da, Bakea, Gurutzeta eta Burtzeña auzoetan ere edukiontziak jarri direlako, baina auzo horietan ez da sentsibilizazio-kanpaina bakar bat ere egin”.
“Diru-laguntzak eskatzeko epea urtarrilaren 5ean ireki zen berriro, epe hori argitaratu zen, baina ez dakigu gobernu-taldeak zer plan dituen; espero dugu udalerriko gainerako auzoetara hedatzeko lanean aritzea”, azpimarratu du Ezker Anitza-IUk, EQUO Berdeak eta independenteek osatutako koalizioko zinegotziak. Sánchezek dioenez, “diru-laguntzen araudian autokonpostadoreentzako partida dago, baina partida hori ez da inoiz eskatu, ez da horrelakorik sustatzen ari, baina azaltzen da mozioan, eta, gainera, mesedegarria izango litzateke” nabarmendu du.
“Erakunde ekologistak aspalditik eskatzen ari diren arren, oraindik ez daukagu ingurumen-kontseilurik, eta batzordeek ere ez dute askotarako balio; ez da informaziorik ematen eta ez da proposamenik ere egiten”, gaitzetsi du zinegotziak. “Proposamenak soilik egiten dira osoko bilkuratik igaroko den zerbait eraman behar dutenean nahitaez”. “Eta hori gutxi balitz, gauza horietako batzuk bildu beharko lituzketen planak ez dira abian jartzen ari; esate baterako, Tokiko Agenda 21, 2017ko apirilean izan genuen horren berri azkeneko aldiz. Zer hiri-eredu ari gara eraikitzen?”, bukatu du Sánchezek.