- EQUOko bozeramaile federal Juantxo López de Uraldek adierazi duenez, gauza ziurra da zentral guztiak itxiko direla
- Prozesua planifikatuta egin behar dela nabarmendu du, energiaren prezioan eraginik izan ez dezan
EQUOko bozeramaile federal Juantxo López de Uraldek uste du Santa María de Garoñako zentral nuklearraren itxierari buruzko erabakiak Espainian aurre egin beharreko ezinbesteko trantsizio energetikoari buruzko debatea berpizten duela. “Nagusitzen ari den jokalekuarekin pentsatzen hasi behar dugu jada, zentral nuklearrik gabeko, ikatzik gabeko eta energia kutsagarririk gabeko jokalekuarekin. Eta modu ordenatuan planifikatu behar dugu trantsizio hori. EQUOn aspalditik ari gara debate hori sustatzen, une horretara egoera aldez aurretik kontrolatuta iristea komeni baita, neurriak jarriz eta erraztasunak eta alternatibak emanez, energia garbi, berriztagarri eta seguruen erabilera sustatuz eta bultzatuz, enplegu-nitxo bat osatzen dutela ere kontuan izanda”, adierazi du Uraldek, prozesuari modu planifikatuan ekiteak duen garrantzia nabarmenduz, betiere energiaren prezioan eraginik izan ez dezan.
Kobozeramaile federalak Gasteizen egin du gaur goizean agerraldia komunikabideen aurrean EQUO Berdeak alderdiko kobozeramaile Erika Martínezekin batera, zentral nuklearraren itxierari buruz atzo emandako balorazio urgenteaz gain beste balorazio osagarri bat eskaintzeko. López de Uralderen ustez, erabaki honek aurrekari bat ezartzen du gainerako zentralen bizitza baliagarria luzatzeari begira. “Garoñarekin lortu da eta bide berari jarraitu behar zaio gainerako parke nuklearrarekin: hurrengoak Almaraz I eta II izango dira, gero Valdellòs… gauza ziurra da zentral guztiak itxiko direla. Horixe da haien etorkizun bakarra”, adierazi duenez.
Industria nuklearrak oraindik ere bideratu ez duen arazo larria nabarmendu du diputatu berdeak, hondakin erradioaktiboen arazoa, alegia. “Industria nuklearraren defizita dira, energia hori ez baita ez garbia ezta segurua ere. Konpondu gabeko arazo handi bat da, ingurumenaren, osasun publikoaren eta ekonomiaren alorrean ondorioak dituena. Kasu honetan, Garoñan ez dago lekurik hondakin erradioaktibo gehiagorentzat, urtegia saturatuta dago ia”, adierazi duenez.
Nuclenor enpresaren datuen arabera, gastatutako erregaitik eratorritako jarduera erradioaktibo handiko hondakinen 218 tona daude Burgosko plantan metatuta, errektorearen barne-osagai batzuekin batera. “Desegite-prozesua luzea izango da, eta adi jarraituko dugu aldi horretan, segurtasun-neurri guztiak zorrotz bete daitezela eskatuz”.
López de Uralderen ustez presio sozial eta politikoa lagungarri izan da zentrala ixteko, baina zehaztu duenez benetako arrazoia da Garoña zentral zaharkitu eta arriskutsu bat zela, eta ez zela jada errentagarria.
EQUO Berdeak alderdiko bozeramaileak bereziki eman dizkie eskerrak zentral nuklearraren aurka mobilizatu diren pertsona eta erakundeei, eta pozik agertu da PPren Gobernuak egindako norabide-aldaketarengatik, aldaketa bortxatua izan bada ere. “Orain, energetikoki zaharkitua, kutsagarria eta etorkizunik gabea den eredu bat defendatzeagatik politikoki eta sozialki bakarrik geratu den Gobernu batek bidea zabaldu dio gure herrialdean energia nuklearraren amaieraren hasierari”.