Irabazi Bergararen ustez ezinbestekoa eta premiazkoa da, epe ertainean, Bergaran alokairu sozialeko etxebizitza-parke publiko bat izatea, hau da, familien diru-sarrerak kontuan hartuko dituzten arrazoizko prezioak izango dituen etxebizitza-parke publiko bat. Proposatzen dugu ez litzatekeela sekula familiaren diru-sarreren % 30 gainditu beharko, jabekideen erkidegoko gastu finkoak eta abar barnean hartuta. Diru-sarrera txikiagoak dituzten familien kasuan, ehuneko hori % 15 ingurukoa izango da.
“Horixe da gure helburua eta behin eta berriro errepikatzen jarraituko dugu; izan ere, bidezko kontu bat izateaz gain, giza eskubideen kontu bat ere badelako”, nabarmendu du Irabazi Bergarako EQUOko zinegotzi Aiert Lizarraldek.
Irabazi Bergarak bi urte baino gehiago daramatza gobernu-taldeari eskatzen behar diren urratsak egiteko alokairu sozialeko etxebizitza-parke bat lortzeko. Eskaera horri entzungor egin zaio sistematikoki. Horrenbestez, Bergarako gazteek zailtasun handiak dituzte etxebizitza duin bat lortzeko. “Guk uste dugu Bergarako gazteek etxebizitza alokairuan lortzeko emandako laguntzara bideratutako 30.000€-ko aurrekontu-partida ez dela nahikoa”, adierazi du Lizarraldek.
Azken bi hamarkada hauetan Bergaran etxebizitza mordo bat eraiki den arren, etxebizitza horietatik oso gutxi bideratu dira alokairu sozialera. Alokairuko etxebizitzarik ez dagoenez eta etxebizitzak garestiak direnez, aukera bakarra etxebizitzak erostea da. “Egoera hori finantza-erakundeak eta eraikuntza-enpresak ados jarrita egindako eskuineko politiken ondorio da, eta politika horiek direla medio, gure bizilagunek baldintza oso prekarioetan bizi behar dute”, kexatu da Lizarralde.