• Onartutako partida gehienak ingurumen- eta gizarte-alorreko neurrietarako izango dira, Harrerako Aterpetxea abian jartzeko adibidez, Santiañes komentu zaharra birgaitu ondoren.
• Nabarmentzekoa da, halaber, energia-autokontsumoa sustatzeko eta diruz laguntzeko programa, eta Gobernuak, koalizioarekin sinatutako akordioari jarraikiz, 63.000 euroko partida bat jarriko du programa hori bultzatzeko.
Ezker Anitza-IUk, EQUOk, Alternativa Republicanak eta Independenteek osatutako Irabazi Eibar koalizioak akordio bat lortu du Eibarko PSE-EEren Gobernuarekin, guztira 475.300 euroko zenbatekoarekin aurrekontuari egindako ekarpenak aurrera ateratzeko. Irabazi Eibar abstenitu egingo da Gobernuak diseinatutako kontuen bozketan.
Udal-kontuen negoziaziotik emaitza ona atera duen udal-talde bakarra da, oposizioaren beste bi taldeekin ezinezkoa gertatu delako azkenean adostasun batera iristea.
Konprometitutako partida gehienak ingurumen- eta gizarte-alorretako neurrietarako izango dira. Nabarmentzekoa da Harrerako Aterpetxe bat abian jarriko dela Santiañeseko komentu zaharra birgaitu ondoren. 82.500 euroko partida horren barruan hartuko dira, batetik, aterpetxea sortzea, komentua –mojen gela zaharrak, jangela eta gainerako gelak— erabilera berrira birgaitu ondoren, eta, bestetik, eraikinaren inguruko lursaila berreskuratu eta aprobetxatzea. Hiri-baratzeetako proiektu bat gauzatuko da eremu horretan.
Lanbidek bere gain hartuko ditu harrera-etxe hori kudeatzeko lanak, 57.500 euroko partida batekin. “Premia duten pertsonei arreta eskaintzea da gure lehentasun nagusietako bat. Hemen 27.500 biztanle gara, eta eskualde osoan, Eibartik Mutrikuraino, aterpetxe bat ere ez dago jardunean une honetan. Proposamen hori onartzea garrantzi handikoa da guretzat. Janari-txartelari 3.500 euro gehiago erantsiz osatu dugu, baina gure asmoa jangela sozial bat lortzea izango litzateke” azpimarratu du María Jesús Aguirrek, EQUOk Irabazi Eibar koalizioan duen zinegotziak.
Gizarte-alorrean Aguirrek azpimarratu du, halaber, errefuxiatuei laguntzeko zuzenketa onartu izana, Gurutze Gorriari 10.000 euro ematea ekarri duena; “Immigraziorako eta aniztasunaren integraziorako III. Plana”, eta langabeen prestakuntzarako 35.000 euroko partida.
Ingurumenaren alorrean, Irabazi Eibar koalizioak lortu du udal Gobernuak 63.000 euro inbertitzea energia-autokontsumoa sustatzeko neurrietan, “hori funtsezkoa baita gaur egun, berriztagarriak bultzatu eta sustatzeko ekimenek zailtasunak aurkitzen dituztelako sarri”, zehaztu du zinegotziak.
Koalizioak aurrera atera ditu, halaber, animaliak babesteko ekarpenak, 15.000 eurorekin gutxi gorabehera, eta aurrera jarraitzen du “Etxeko animaliak eduki eta babesteko ordenantza” berri bat egiteko prozesuan lagunduz eta inplikatuz.
Hirigintzaren eta zerbitzuen alorrean, berriz, María Jesús Aguirre zinegotzi berdeak azpimarratu du Gobernuak, argi eta garbi, eskailera mekanikoen ordez igogailuak jartzearen aldeko apustua egin duela, koalizioaren proposamena aztertu ondoren. “Mantentze-lanetan soilik, oso alde handia dago bi aukeren artean: eskaileretan 500.000 euro gastatu behar dira urtean, eta igogailuetan 20.000 euro bakarrik urtean”.
Gainera, koalizioak nabarmendu du aurrekontuak negoziatzean Unzaga Plazan markesinak jartzea eskatu dutela, “eibartar guztiontzat hori ezinbestekoa delako”, eta horretarako 50.000 euroko partida bat onartzea lortu dutela.
Irabazik proposatzen du Gobernuak guztira onartutako 475.300 euroko kopurua Gobernuak aurkeztutako aurrekontu-zirriborrotik kentzea, gastu publikoaren igoera zero izan dadin.