Udalberri – Bilbao en Común taldearen bitartez, eta EH Bildu eta Ganemos Goazen Bilbaorekin batera, proposamen bat aurkezten dugu otsailaren 23ko osoko bilkuran eztabaidatzeko; proposamen horretan Udalari eskatzen zaio Eusko Jaurlaritzak auditoria independente bat egin dezala euskal Y-aren proiektuaren errentagarritasun ekonomiko eta soziala eta ingurumenari lotutako errentagarritasuna aztertzeko.
Proposamenaren justifikazioetan EHUko ikertzaileek egindako azterlana aipatzen da, eta bertan ondorioztatzen dute euskal Y-an egin beharreko inbertsioa “ez dagoela justifikatuta”, izan ere, trazadura eraikitzeak kostatuko dituen 10.000 milioi euroez gain Eusko Jaurlaritzak gutxienez beste 40 milioi jarri beharko baititu trenak zirkulatzeko.
Eztabaida bultzatu nahi dugun udal-taldeak bat gatoz eta “azterlan honetan egin diren kalkuluak ezagutzen ditugu, baina Eusko Jaurlaritzak eta Espainiako gobernuak azpiegitura horren eraikuntza justifikatzeko erabilitako datuen berririk ez dugu”.
Udalberriko bozeramaile Carmen Muñozek zalantzan jarri du makro-inbertsio honen erabilgarritasun soziala: “EAJk behin eta berriz dio proiektu honek garapen ekonomiko ikaragarria ekarriko duela, baina azterlanak azpimarratzen du argudio hori gutxienez ere eztabaidagarria dela, gure lurraldearen egituraketan eragin negatiboa duelako, hirigune handiei bakarrik ekarriz onura, udalerri ertainen eta landa-inguruen kaltetan”.