- EEEk eguzki-parke handi bat proiektatu du Arasurren. Alabaina, ur beroaren hornidurarako eraikinetan ezarritako eguzki-panelen % 84k ez dute funtzionatzen “akats larrien” ondorioz.
- Gainera, eguzki-baratze hori sortzeko sortu duten figura juridiko-enpresarialak —sozietate instrumental bat, energia fosilei lotutako energia-enpresak biltzen dituena— zalantza asko dakartza berekin.
EQUO Berdeak alderdia kexatu da Eusko Jaurlaritzak eguzki-energiaren alde egiten duen apustua kosmetika hutsa dela uste dugulako Gure ustez hori berriz ere agerian geratu da Arasur poligonoan 24 MW-ko baratze fotovoltaiko bat inauguratuko dutela iragarri dutelako, abian jartzeko 24 milioi euroko inbertsio globala beharko duena. Energiaren Euskal Erakundeak Arasurren gaineko propaganda-jarduera hori garatzen duen bitartean, orain artean egindako ikuskapenen arabera, Euskadin etxeko ur beroa hornitzeko eraikinetan ezarritako eguzki-panelen % 84k ez dute funtzionatzen “akats larriak” dituztelako, Gobernuak berak emandako datuen arabera.
Euskal herritarrok ikusten dugu egun Europako gainerako herrialdeetan eguzki-energiak aurrera egiten duela etengabe, partikularren eskuetan dauden eguzki-instalazio deszentralizatuen bitartez; aldiz, joera hori ez da Euskadira iristen, Eusko Jaurlaritza geldituta dagoelako orain hamar urteko proiektu zaharkituei eusten: instalazio zentralizatu bat proiektatzen du, kontsumoguneetatik urrun eta beste erabilera batzuk eduki zitzaketen lurretan. Alderdi berdeak gogora ekarri duenez, energia berriztagarriek Euskadin guztira kontsumitzen den energiaren % 7 baino pixka bat gehiago dakarte, eta zoritxarrez 10 urtetik gora daramagu horrela, Eusko Jaurlaritzak gas naturala bultzatzen jarraitzen duen bitartean.
Gainera, EQUO Berdeak alderdiaren ustez, eguzki-baratze hori gauzatzeko sortu duten figura juridiko-enpresarialak —sozietate instrumental bat, energia fosilekin zerikusia duten energia-enpresak eta proiektuaren bultzatzaile diren EEE Energiaren Euskal Erakundea eta Mondragon Korporazioan integratutako KREAN taldea biltzen dituena— zalantza asko dakartza berekin. Horregatik, EQUO Berdeak alderdiak Elkarrekin Podemosen duen legebiltzarkide José Ramón Becerraren bitartez, Gobernuari honako galdera hauek egin behar dizkiogu:
Zer sozietate izango da eguzki-instalazioaren titularra, behin eraikitzen denean?
Zer ordezkaritza izango du Energiaren Euskal Erakundeak sozietate horretan? Zenbatekoa izango da, ehunekotan?
Zer eskubide izango ditu instalazioaren kudeaketari dagokionez?
Zer lurren gainean eraikiko da eguzki-instalazioa? Zein dira lur horien titularrak? Zer hirigintza-kalifikazio daukate lur horiek? Kalifikazio hori egokitu egin beharko da nolabait, proiektua aurrera eraman ahal izateko?
Proiektuan parte hartuko duten enpresek, akziodun gisa parte hartuko al dute? Hala bada, nola banatuko dira ondoriozko sozietatearen akzioak?
José Ramón Becerra legebiltzarkideak Eusko Jaurlaritzari eskatu dio, halaber, Euskadin ezarritako eguzki-panel termikoek “ongi funtziona dezaten zer egin behar duten” argitzeko, “baita, panel horiek energia jasangarri eta garbia sortzeko, eta, bide batez, milaka euskal familiaren energia-faktura murrizten laguntzeko duten eginkizuna bete dezaten zer egin behar duten” azaltzeko ere.